|
Tónleika- og sjónleikabólkurin umborð á Høganesi
(Sluppin Høganes liggur við bryggju í bátahylinum í Runavík)
"Tónasjón" (Tónleika- og Sjónleikabólkurin umbord á Høganesi) er ein bólkur av skálafjarðabúgvum, sum síðani marsmánaða 1991 hava skipað fyri mentunartiltøkum á sluppini Høganes.
Endamálið við hesum arbeiði er at skapa eitt stað í Eysturoynni, har t.d. tónleikarar kunnu koma at framføra tónleik sín, og har tónleikurin - og tað hann ber í sær - verður settur í hásætið. Higartil hava tiltøkini umborð á sluppini fevnt um m.a. fólkatónleikaframførslur av ymiskum slag (vísuløg, spælimannstónleik, indiana- og sáma skjaldur, sjómansvísur), jazz-tónleik (modernaðan og traditionnellan), poesi-upplestur, rock- og popptónleik, heavy rock, ferðafrásagnir, klassiskan tónleik og eina einkulta kabarett.
Tónleikarar og sjónleikarar bæði úr Føroyum og uttanlanda (t.d. Danmark, Svøríki, Spania, U.S.A.) hava framført, og yvirhøvur hava teir latið væl at skipinum og kanska serstakliga akkustikkinum. Allir hava teir framført so at siga ókeypis, men ikki við minni ágrýtni av teirri orsøk. Teir spæla tað, teimum dámar, og sum teir fegnir vilja deila við áhoyraran. Umborð á Høganesi er onki at skerja frælsi teirra í so máta.
Hevur tú hug at royna teg á Høganes-pallinum sum tónleikari, upplesari ella okkurt tílíkt, um tú hevur onkur hugskot ella um tú hevur hug at vera við í arbeiðinum hjá Tónasjón, so ert tú vælkomin at venda tær til okkara.
Havið eyguni eftir lýsingum okkara um komandi tiltøk!
|
The photos at the top of this page: 1. Bridge in Glyvrar 2. Sluppin Høganes 3. From above Runavík |
Copyright © 1997 - 2009 Framtak, FO-650 Toftir, Faroe Islands |
|
|
|